Të dashur futbolldashës kosovarë,

Që 15 vite me radhë futbolli kosovar ka mbijetuar falë përkushtimit të parezervë të futbollistëve, trajnerëve , punëtorëve sportiv e sidomos falë sponsorëve të klubeve, të cilët nuk kanë kursyer asgjë në këtë drejtim, dhe ne mburremi me këtë fakt.
Ëndrra jonë e kahmotshme e ndërkombëtarizimit të sportit nuk është më ideal, por ditët i ka të numëruara. Futbolli i Kosovës do të jetë prezent në arenën ndërkombëtare si edhe të gjitha shtetet tjera.
Në këto momente na nevojitet pjekuria sportive e udhëheqësve të klubeve, mirësjellja profesionale e futbollistëve si dhe vetëdijësimi maksimal i simpatizuesve të futbollit, të cilët në mënyrë të denjë duhet t’i përkrahin klubet e tyre.
Ky është obligim i të gjithë atyre të cilët ia dojnë të mirën Kosovës dhe futbollit të saj.
Federata e Futbollit të Kosovës e ndanë fatin e njëjtë me klubet, është në shërbim të tyre, por na mban të gjallë fakti se së shpejti do të jemi pjesë e familjes së madhe evropiane të futbollit.
Të jemi optimist, të mendojmë dhe të sillemi pozitivisht, këtë ua kemi borxh fëmijëve tanë. Mundësitë i kemi të hapura, por na nevojitet shumë punë dhe sinqeritet.
Të vihemi të gjithë në shërbim të futbollit të Kosovës.

Me nderime,
Kryetari i FFK-së
Fadil Vokrri