Trepça’89 e mposhti Feronikelin, Prishtina fitoi në shtëpi 

Sot janë zhvilluar pesë ndeshje në kuadër të javës së 28-të të Raiffeisen Superligë. Trepça’89 ka arritur ta mposhtë skuadrën kryesuese, Feronikelin, me rezultat 3:1 në stadiumin “Riza Lushta”, në Mitrovicë, duke ia ndërprerë serinë pozitive skuadrës nga Drenasi. Që nga fillimi i ndeshjes mitrovicasit ishin më të mirë dhe qysh në minutën e 3-të kaluan në epërsi me golin e Argjend Mustafës nga distanca. Epërsinë në 2:0 e shtoi Blerand Kurtishaj nga penalltia, pasi paraprakisht Shpëtim Idrizi u pengua në mënyrë të palejueshme brenda zonës së rreptësisë. Në minutën e 59-të vendasit shënuan edhe golin e tretë, kur Ard Limani finalizoi një asistim të Kurtishajt. Ndërkohë, golin e vetëm për kampionët në fuqi e realizoi Mark Milicaj, në minutën e 86-të. Një ndeshje shumë interesante u zhvillua në kryeqytet, ku Prishtina shënoi fitore kundër Dritës, me rezultat 3:2. Labinot Osmani (34’) shënoi golin e parë për Prishtinën, epërsinë e dyfishoi Kreshnik Lushtaku (50’), ndërkaq, Petrit Osmani realizoi golin e tretë (62’). Në anën tjetër për gjilanasit shënuan Florim Berisha (73’) e Shqipërim Kelmendi (80’). Pikët e plota në shtëpi këtë javë i arkëtuan edhe Gjilani dhe Besa. Gjilani e mundi Drenicën, me rezultat 2:1, me golat e Arbër Shalës (5’) dhe Gëzim Rusit (76’), kurse për drenicasit shënoi Granit Arifaj (79’). Ndërkaq, Besa e mundi Llapin, me rezultat 2:0, me golat e Kastriot Rexhës (24’) dhe Fatih Karahodës (33’). Ndërkaq, sfida ndërmjet Vushtrrisë dhe Lirisë është mbyllu pa gola, takim ky që u zhvillua në stadiumin ‘Ferki Aliu’.