Derbi Besa-Prishtina nuk jep fitues, fitojnë Feronikeli, Trepça'89 dhe Liria 

11 shtator, 2016 – Sot janë zhvilluar katër ndeshje në kuadër të javës së 4-t në Vala Superligën e Kosovës në futboll. Derbi i kësaj jave ndërmjet Besës dhe Prishtinës, që u zhvillua në stadiumin “Shahin Haxhiislami” në Pejë, në praninë e një numri të konsiderueshëm të shikuesve, u mbyll pa fitues, 1:1. Prishtina kaloi në epërsi në minutën e 17-të, me golin e shënuar nga Basit Khalid. Pas golit të pësuar ishin pejanët që morën iniciativën, duke u përpjekur që sa më parë të barazojnë shifrat, por këtë nuk arritën ta bëjnë deri në minutën e 92-të, kur pas një aksioni të rrjedhshëm Fisnik Papuqi nga e majta e shërbeu mjaft mirë Qemail Elshanin në afërsi të portës, i cili reagoi para mbrojtësve prishtinas për ta çuar topin në rrjetën e Alban Muçiqit, për të vendosur njëherësh rezultatin përfundimtar 1:1.
Fitore me rezultat bindës këtë fundjave ka arritur Trepça ’89, e cila në ‘Riza Lushta’ e mundi Llapin, me rezultat 3-0. Florent Hasani (28’) dhe Fiton Hajdari (48′, 70′) shënuan për fitoren e mitrovicasve. Fitore pa vështirësi të madhe ka shënuar edhe Liria, e cila në shtëpinë e saj e mundi Dritën, me rezultat 3-1. Meriton Korenica (1’), Blendi Memaj (47’,) dhe Alban Shilova (53’) u përkujdesën për fitoren e prizrenasve, kurse, golin e nderit për gjilanasit e realizoi Blagoje Gllaveski (71′). Ndërkaq, skuadra kampione në fuqi, Feronikeli ka shënuar fitoren e dytë në këtë edicion, duke e mposhtur Ferizajn, më vështirë se sa pritej me shifrat 2:1. Golat për Feronikelin i shënuan Mendurim Hoti (4′) dhe Blerand Kurtishaj (66′), derisa golin e barazimit të përkohshëm për ferizajasit e realizoi Edon Sadriu (60′).
 
Vala -Superliga Java e 4-t