14 prill, 2021 – FC Liqeni nga Drenasi është fitues i Kupës së Kosovës në futsall. Në ndeshjen finale të kësaj gare, klubi i themeluar vetëm para dy vitesh, ka arritur ta mposhtë klubin gjakovar, FC Liburni, me rezultat 5:3, pas vazhdimeve dy herë nga 5 minuta, ngase ndeshja në kohën e rregullt u mbyll baras 3:3. Kjo finale dhuroi lojë shumë të fortë dhe cilësore, por fatkeqësisht për shkak të situatës me pandeminë u zhvillua pa praninë e tifozëve në Pallatin e Rinisë dhe Sportit në kryeqytet. Të pranishëm ishin vetëm drejtuesit e FFK-së si dhe zyrtarë të dyja klubeve. Më meritorët për suksesin e Liqenit ishin treshja kolumbiane: Yulian Diaz, Stiven Abril dhe Kamilo Sanchez. Ndeshja nisi mirë për Liburnin që kaloi në epërsi në minutën e dytë me golin e Halim Selmanajt, por dy minuta më pas shifrat i barazoi Stiven Abril. Në vazhdim të pjesës së parë loja ishte krejtësisht e baraspeshuar. Pjesa e dytë nisi më mirë për skuadrën drenicase, e cila arriti që të krijojë epërsi prej dy golash nëpërmjet Kamilo Sanchez dhe Stiven Abril. Më pas ishte Liburni që dominoi lojën dhe ishte në kërkim të barazimit, gjë të cilën edhe e arriti. Fillimisht diferencën e ngushtoi Ermir Kryeziu, derisa 8 sekonda para mbyllje së takimit Halim Selmanaj barazoi rezultatin në 3:3, për ta çuar ndeshjen në vazhdime, e ku Liqeni u tregua më i suksesshëm. Yulian Diaz shënoi për 4:3 në minutën e 45-të, derisa fitoren e Liqenit e vulosi Granit Humaj, dy minuta më vonë nga 10-metërshi. Në fund, trofeun kapitenit të Liqenit, Dardan Topilla ia dorëzoi presidenti i FFK-së, Agim Ademi, derisa medaljet për Liqenin dhe Liburnin i ndanë sekretari i përgjithshëm, Eroll Salihu, kryetari i Komisionit për futsall, Haki Xhemajli dhe koordinatori Arben Zhjeqi. Medaljet për gjyqtarët dhe zyrtarët e ndeshjes i ndau Komisari i Garave, Hysni Gjinovci.
Pas ndeshjes kapiteni i Liqenit, Dardan Topilla u shpreh i lumtur për suksesin e arritur, por theksoi se synimi i tyre është suksesi në garat e “play-off”-it të Superligës. “Për mua kjo nuk është hera e parë që kurorëzohem me këtë trofe, por për ekipin e Liqenit është një sukses i jashtëzakonshëm. Është kënaqësi ta fitosh kupën, sidomos me një klub që është themeluar vetëm dy vite më parë. Ne jemi duke u përgatitur edhe për ‘play-off’ të Superligës dhe besojmë shumë që atje do të jemi edhe më të fortë. Tre bashkëlojtarët tanë kolumbianë jo vetëm që e kanë përforcuar ekipin tonë, por janë duke e bërë diferencën edhe në ligë. Thjesht është një treshe fantastike”, ka theksuar Topilla.