16 maj, 2021 – Presidenti Agim Ademi nëpërmjet një mesazhi ka uruar FC Prishtina dhe KF Llapi, dy skuadrat që këtë edicion u kurorëzuan me trofe. Derisa FC Llapi ditë më parë iu gëzua Kupës së Kosovës, duke e mundur pas penalltive Dukagjinin (4:3), Prishtina sot iu gëzua titullit të kampionit të Superligës, pas fitores kundër Gjilanit (2:1).

Mesazhi i presidentit Ademi:

Të nderuar drejtues, futbollistë, trajnerë, staf teknik dhe tifozë të FC Prishtina dhe të KF Llapi, më lejoni që në emrin tim dhe të KE të FFK-së t’ju uroj për titullin e kampionit në Superligë, përkatësisht për suksesin në Kupën e Kosovës.
 
Ky edicion i Superligës për herë të parë u zhvillua në formatin e ri të garave me 10 skuadra dhe solli ngritje të cilësisë por edhe rivalitet të madh, si në garën për titull e dalje në Evropë, ashtu edhe në atë për mbijetesë.
 
Sot, një javë para përfundimit të këtij kampionati, FC Prishtina arriti t’i gëzohet titullit të kampionit, që për këtë klub është i veçantë, ngase ky trofe i ka munguar tash e 8 vjet.
 
I veçantë dhe historik ishte edhe suksesi i KF Llapi në Kupën e Kosovës, pasi ishte trofeu i parë i këtij klubi, që ua siguron edhe debutimin në garat evropiane.
 
Sigurisht se sikurse ju, edhe ne do të kishim dëshirë që pjesë e festës tuaj në ndeshjet vendimtare të ishin edhe tifozët në stadium, por pandemia Covid-19 ende po na e pamundëson një gjë të tillë.
 
Uroj që edicionin e ri të garave të krijohen rrethanat që të luani në praninë e tifozëve, të cilët pa dyshim i japin ngjyra spektakli dhe magji lojës sonë të dashur – futbollit.
 
Duke ju dëshiruar sukses dhe përfaqësim dinjitoz në garat evropiane, ju përgëzoj të dyja klubeve edhe një herë për suksesin e arritur dhe për lojërat e treguara në këtë edicion.
 
Ju inkurajoj të vazhdoni të punoni me përkushtim e vendosmëri në progresin e lojës së futbollit!
 
Ju priftë e mbara!

Me respekt,
Agim Ademi – President i FFK-së