26 shkurt, 2023 – Sot janë zhvilluar tri ndeshjet e fundit të javës së 22-të në Albi Mall Superligën e Kosovës në futboll. Prishtina mposhti Llapin, me rezultat 2:0 në stadiumin “Zahir Pajaziti” në Podujevë, duke i dhënë fund serisë së rezultateve negative në fillim të këtij stinori. Në fakt, kjo ishte fitorja e parë e Prishtinës në pranverë pas tre humbjeve radhazi, ndërsa Llapi pësoi humbjen e parë pas tri fitoreve rresht. Golat u shënuan në minutën e 41-të nga Albin Prapashtica dhe në minutën e dytë të kohës shtesë nga Endrit Krasniqi, i cili përfitoi nga gabimi i portierit Ilir Avdyli.
Pikë si mysafir shkëputi edhe Dukagjini i Klinës, që arriti ta ndalë në barazim kampionin në fuqi, Ballkanin, me rezultat 1:1, në fushën me bari sintetik në Suharekë. Klinasit kaluan të parët në epërsi me golin e Oto John nga penalltia në minutën e 18-të, ndërsa Albion Rrahmani shënoi sërish gol për Ballkanin në minutën e 56-të, duke e vendosur rezultatin përfundimtar. Pavarësisht barazimit, Ballkani mbetet lider në tabelë me 48 pikë, ndërsa Dukagjini ndodhet në vendin e gjashtë me 26 pikë.
Në ndeshjen tjetër, Gjilani fitoi ndaj Trepçës ’89 në shtëpi, me rezultat 1:0. Golin e vetëm të ndeshjes e shënoi Albert Dabiqaj në minutën e 76-të. Kjo ishte fitorja e dytë e radhës për Gjilanin, ndërsa Trepça ’89 pësoi humbjen e tretë të njëpasnjëshme në pranverë.