Trepça 89 e Drenica fituan si mysafirë 

Trepça’89 dhe Drenica kanë shënuar fitore si mysafire në kuadër të javës së dytë në Raiffeisen Superligë. Trepça’89 ka shijuar fitoren e dytë, duke e mposhtur Llapin, në stadiumin e Flamurtarit në Prishtinë, me rezultat 2:1. Mitrovicasit kaluan në epërsi në minutën e 12-të me golin e shënuar nga Pleurat Hajdini, pas asistimit të Blerand Kurtishajt. Llapjanët arritën të barazojnë shifrat me golin e Enis Zabërgjës pas shërbimit të mirë të Alban Mavriqit. Megjithatë, skuadra e Arsim Thaçit arriti ta rikthejë epërsinë në sekondat e fundit të pjesës së parë, kur Mërgim Pevçeli shënoi me kokë. Fitore me të njëjtin rezultat shënoi edhe Drenica në Kizhnicë në duel me Hajvalinë, derisa Istogu dhe Prishtina e mbyllën ballafaqimin e tyre pa fitues dhe pa gola.