Tri ndeshje, tri barazime 

Tri ndeshjet e zhvilluara, të dielën, në kuadër të javës së 14-të në Raiffeisen Superligë kanë përfunduar pa fitues. Skuadra e Prishtinës ka arkëtuar një pikë në udhëtimin e vështirë në Mitrovicë, duke e mbyllur sfidën me Trepçën’89, me shifrat 2:2. Prishtinasit krijuan epërsi në pjesën e parë 2:1, me dy golat e Liridon Latifit, teksa për mitrovicasit shënoi Drilon Musaj. Megjithatë, për t’i barazuar shifrat u përkujdes zëvendësuesi, Emin Baliqi, me një gol të shkëlqyeshëm nga distanca. Në barazim, por vetëm me nga një gol të shënuar u mbyll edhe sfida në “Shahin Haxhiislami” në Pejë, ndërmjet Besës dhe Feronikelit. Pejanët kaluan në epërsi nga penalltia me golin e Mensur Durakut, por një pikë skuadrës kryesuese nga ky udhëtim ia ‘dhuroi’ Fidan Hasani, me një autogol në minutën e 84-t. Ndërkohë, fitues nuk pati as në Gjilan, në ndeshjen ndërmjet Dritës dhe Trepçës, por këtu munguan edhe golat.
 
Rezultatet e ditës së diel
Raiffeisen Superliga : Java e 14 të, Ora 13.00