Vëllaznimi arkëtoi një pikë kryeqytet, fitojnë Besa, Trepça'89 e Kosova (V) 

Sot janë zhvilluar katër ndeshje në kuadër të javës së 23-të në Raiffeisen Superligë. Prishtina ka barazuar para tifozëve të vet kundër Vëllaznimit, me rezultat 0:0. Ballafaqimi mes prishtinasve dhe gjakovarëve ka dhënë lojë me pak raste dhe asnjë gol të shënuar. Trepça ’89 ka vazhduar me paraqitje të mirë duke mundur Ferizajn, me rezultat 4-0, dhe duke bërë edhe një hap të madh në garën për kreun e tabelës. Skuadra e Afrim Tovërlanit dukshëm ishte më e mirë në terren, ndërsa për fitoren e “minatorëve” u përkujdesën Blerand Kurtishaj më dygolësh në minutën e 33-të dhe 60-të, kurse nga një gol e shënua Kreshnik Lushaku në minutën e 51-të, e Berat Hyseni në minutën e 68-të. Besa sërish e ka mposhtur ekipin fqinj, Istogun, me rezultat 1-0. Pejanët që po kalojnë formë mjaft të mirë, kanë marrë edhe tri pikë të mëdha në garën për titull të kampionit. Mensur Duraku në minutën e 14-të nga pika e bardhë realizoi golin e fitores për skuadrën e Arbnor Morinës, e cila tani arrin në kuotën e 41 pikëve dhe ngjitën në vendin e dytë. Ndërkohë, Kosova e Vushtrrisë e ka mposhtur Trepçën, me rezultat 2-1.  Daut Maxhuni në minutën e 46-të, dhe Veton Shabani në minutën e 55-të shënuan për fitoren e vushtrriasve, skuadër kjo që zë vendin e gjashtë më 36 pikë.
Rezultatet e ditës së diel